Ons het die volgende vrae gerig aan Dr Andre Botma:

1. Die frase ”ekklesia reformata, semper reformanda” word vandag gebruik en misbruik vir die bereiking van ‘n verbasende reeks teologiese en ekklesiastiese doelwitte. Wat was die oorspronklike bedoeling van “semper reformanda?”

Hierdie woorde het hulle oorsprong in die tyd van die reformasie. Die reformasie verwys na die tyd toe die kerk hom van die dwalinge van die Roomse Kerk gesuiwer het volgens die Woord van God. Die bedoeling was dat die kerk eintlik ‘n voortdurende taak het om weer na die Skrif te gaan kyk en die kerk daarvolgens te hervorm. Dit geld natuurlik vir die kerk as instituut en vir elke gelowige.

2. Kan die wegbreek van beswaardes vanaf die NHKA gesien word as ‘n tipe reformasie?

Gesien in die lig van hedendaagse omstandighede ten tendense: ja. Daar is ‘n neiging in baie geloofgroepe (kerke?/genootskappe) om nie meer by Woord te bly nie en om op allerlei bedenklike maniere met die Skrif om te gaan. Die hantering van moeilike kwessies soos kerkeenheid, ekumene en homoseksualiteit getuig daarvan. Daar is ook myns insiens ‘n proses aan die gang by sommige om alle gelowe as ‘gelyk’/’dieselfde’ te beskou. Die beswaardes wil terug na die Skrif en wil poog om die Skrif op ‘n verantwoordelike wyse uit te lê.

3. Wat is die Bybelse begrip van “kerk”?

Kerk is die gelowiges (Fil 1:1). Gelowiges het van vroeg af om verskillende redes saamgekom en gemeentes gevorm. Hierdie gemeentes is kerk, maar bestaan uit die gelowiges wat die gemeentes vorm (Rom 16:16). Paulus sê dat die gelowiges die tempel van God is (1 Kor 3:16) en dat die Gees van God in hulle woon. Die klem val op die geloof van die christene en die feit dat hulle lewens nou die ‘plek’ is waar en hoe ‘n mens God dien.

4. Individuele gemeentes van die GHG word as “ekklesia completa” beskou. Gesien in die lig hiervan, hoe gaan ons verseker dat ons gemeentes getrou aan God en Sy Woord bly?

Ons moet gedurig op verskeie wyses herinner word aan die reformasie en ons eie geskiedenis. Ons behoort getrou te bly aan die belydenis en aan behoorlike, verantwoordelike verkondiging. En natuurlik behoort die belangrike sake van die reformasie altyd vir ons ‘n rigitngwyser te wees naamlik: alleen die Skrif en die geloof.

5. Daar is ‘n wêreldwye beweging na ekumenisiteit. Wanneer is ekumenisiteit wenslik en wanneer nie?

Ekumene is wenslik waar dit tot opbou van die geloof dien. Dit het egter in baie gevalle ontaard in ‘n gemeenskap of drukgroep waar mag en politiek die botoon voer en waar geloof misbuik word vir veral politieke doeleindes.