OORDENKING

Donderdag 12 November
Van diepte tot hoogte

Jona 2

Vir baie gelowiges kan die lewe soos ’n diep, donker gat voel. Jy voel eensaam, alleen, vasgeval in jou probleme. Ja, in die tyd waarin ons leef, is daar baie gelowiges wat so voel. Dit kan siekte, finansiële nood, kinders in nood, ouers in nood of onsekerheid oor die toekoms wees wat jou aftrek in die diepte van ellende. Ons kan onsself troos, ons is nie die eerstes wat so voel nie en beslis ook nie die laastes nie. Ons lees van ’n bekende man in die Bybel wat die diepte van sy nood verwoord het, Jona.
Jona verwys na nege stappe van sy heengaan na die diepte van sy ellende. Dit was nie net fisies nie, maar in die besonder geestelik. Ons ken Jona se geskiedenis baie goed. Hy het geglo dat hy van God kon wegvlug. Hy het verder geglo dat God hom in die dieptes van die see sou verlaat. Maar God was daar, meer nog, God kom en hef Jona op uit sy ellende. Jona verwys na ses stappe. God plaas hom weer op vaste grond.
Soms voel dit ook vir ons of ons van God verlate is. Dit is nooit waar nie. God is daar, in ons diepste ellende. Maar meer, Hy hef ons op, plaas ons weer op vaste grond. Christus het dit kom wys met Sy kruisiging en opstanding. Trouens, ons bely dit ook elke Sondag. Selfs die dood is nie meer ’n diepte nie. Onthou God vat ons in Christus van diepte na hoogte.
Ds. Rudi Schoeman, Theresapark

𝔊𝔢𝔩𝔬𝔬𝔣𝔰𝔟𝔬𝔫𝔡 𝔳𝔞𝔫 ℌ𝔢𝔯𝔳𝔬𝔯𝔪𝔡𝔢 𝔊𝔢𝔪𝔢𝔢𝔫𝔱𝔢𝔰 Lewensbrood 2026 - (CC BY-NC-ND)